كبرنا ودارت الايام ومازال الجرح مفتوق, رميه // عبدالرحيم البركل
كضاب البقول مشتاق قبل ما يخوض بحور الشوق
بحور الشوق بخوضها براى انا البى حبكم مشروق
جروح الريد علاجن كيف مع القمرى البسوى القوق
كبرنا ودارت الايام ومازال الجرح مفتوق
انا دساتير قلبى مالقيتن ولا واحد فضل مدقوق
فضلتا وحيد عذاى دمعات سكبتها من قلب محروق
صوت الآهة فى الاعماق تناتل فى القمم من فوق
نسمه من الخريف الفات تقول لى الوداع ملحوق
على مهلك تشيل الزاد تسافر فى طريق ممحوق
تشيل همك تقول يا ليل تروح تلحق المخلوق
مهدل وبال وكل الفات يشوف باب الرزق مخنوق
مشتت بين سؤال وجواب وبالا فى الضهر مفروق
حكايتى انا يا امير الناس متل طوريه جنب واسوق
تقلوا كلام مربع وزين وجسمو تلاتى ما مطبوق
تعالى يا نجمع احكى ليك عن الليل السرب لى فوق
ملفح من شعاع الموت موقى حرابو روق جنب روق
مؤمل حالوا بين حجرين يقول يمكن اكون معتوق
فجأة الدنيا تكسى ظلام يشوف قلب الصبر مشقوق
صيغة خطاب - حاتم حسن الدابي +السقيد
صيغة خطاب مكتوبه من قلب الولد
من جوف طفل لحظاتو بين مره وشهد
لسع ما عرف طعم الحياة ويادوبو لسع في المهد
كلنو كان يعرف تمام غير انو مخلوق في كبد
كانت رسالتو دروس حياة في الزهن تسكن للابد
فيها المداد دمعة عيون منسابه الهبة الغدد
كلماتو من معجم لغات الدنيا كلها تستمد
مظروفا جوف كاتم انين فياض دوام ما ليهو حد
والطابعه كانت قبله من بين الشفاه مختومه بي صبر و جلد
عنوانا كان ظاهر مبير من غير حروف اللا اسد
الي رحم امي وختي قوس قبال يقفل القوس قصد
يكتب كلام شان يلفت الانظار قصد
مضمونو بين قوسين يقول( ممنوعه ما يقراها حد)
وكان الخطاب عبر البريد السري حافظ المستند
في ذبذبات هذت دواخل امو لهبا ما برد
لمن صرخ ومسك الثدي واتواري في حجرا وغمد
لما الخطاب وصل الرحم بقي نطفه يادوبك تعد
تكوينا ما وصل المشيج في علقه منتظره المدد
لكن قدر يحكي الظروف الجات عليه بلا وعد
حكي لاخوه وقال كلام لابد من يلقالو رد
وكان الحدث صحوة ضمير علاما حلال العقد
دي رساله من طفلا صغير حكي لاخوه وقال سرد
.................................................. ...
دنيانا ما دنيا واحلامنا ما احلام
دي حقيقه ما رؤيا وقالو السبب اقسام
لو ليك كتب تحيا ضي عالم العلام
طال شوقي لي لقيا وخايف من الايام
********
بالله زنبنا ايه من قبل نتلاقي
نرد الغفار والتيه في الدنيا نتشاقا
ليه شجرة الوالدين يتحتو اوراقا
ما نلقي جيم لسين غير المعيشه اقسام
********
انا شوقي لجيتك دايرك معاي رفيق
بي جيها خايفلك عيشت نشاف الريق
انا نيتي زي نيتك لمت شقيق وشقيق
سالكين طريق مسدود ما بمشي لي قدام
********
انا داير احكي لك احوالي بالتفصل
انا كالضفاف مخضر كانت حياتي قبيل
لكن بدين اصفر لمن هجرني النيل
اسع بقيت مجبر اتحمل الاقدار
********
العيشه بين والدين من مده متفرقين
زي المياه والطين وفقد النظر للعين
بيقلوا مشتاقين شاربين كؤس البين
كاس الوداد في الحين اصبح شرابو حرام
********
ما راعوا للجاين وما قدروا المولود
واظنهم ناسين الجاي والموجود
حتي الشرع والدين اتناسو ليه حدود
لما الصحف رفعت وجفت الاقلام
********
والليله ندمانين ايه الندم بيفيد
خلوني باكي وحزين عايش فرد وحيد
زي زهرة الياسمين من ايد اروح لي ايد
قطعوا الشديد ومتـــين لا غربه لا ارحام
*********
انا داير اوصيك اصبر علي البلوه
ولا بد تلاقيك المره و الحلوه
كل العشم فيك انك تكون اقوي
من كل بلاويكا دنيكا تبقي سلام
***********
الرئيسية 
المنشورات 
صفحتنا على الفيس بك 
