خيت الأمل
ما انقطع خيت الأمل في رجعتك
ولا رجع قلبي المُحب من سكتك
طلع الحبُ عليَّ من ثنايا بسمتك
خفق القلبُ لديَّ لما رنت ضحكتك
طبعت على الاحساس صداها و روعتك
سكبت على الأنفاس شذاك و نشوتك
غنت بلابل الروح نشيدك و غنوتك
حضنت مسارح العين صباحك وطلتك
ضي الشموس شال النَضَار من وجنتك
خِجل القمر غاب معتكف من طلعتك
وعزم النجوم تنظر بهاكِ و بهجتك
حتى الربيع اتوسلك شي من جمالك و فتنتك
مكتوب هواي منذ الأزل في صفحتك
و عايش هواك حلمي الجميل في جنتك
**************************
أنساك لا...
أهواكِ في كل الظـــــروف المستحيلة و ممكنة
وأقراكِ في يَمْ الحروف كلمات رقيقة تشع سنا
وألقاكِ بينات الطيوف
نوار جروف و أزهار جميلة ملونة
أنساك لا
انساك شطبتها من قوامــيس اللغات و الأمكنة
أنساك مسحتها من نواميس الزمان و الألسنة
***
غــبتي و غـــيابــك علمـني أرعـــــاهـا السُــها
متمنطق الصبر الجميل مستني ترجع لي المها
ويرجـــــع ندى فـــرحي الخمـــيل المشتهــى
وتسكب غيومك تطفي نيران الفراق العشتها
***
صـوبرت همسك و ذكرياتك قواسيب في غيابك
وشتلــت بسـمك وأمنياتك جـنة منتظــرين إيابك
ونسجت نغمك توب مطرز من كليماتك ورضابك
ودخلت فيكِ مرق صَبُرْ و حرست بابك
***
يا نجمة فوق كل النجوم إلا النجوم ما بتشبها
بين مسامات الرؤى وهمـس الدواخــل شفتها
حقــنت شـــرايين إعـجـــابي ريد و عشقــتها
واتعاطيت هـواها بلا حدود وبلا حدود أدمنتها
***
**************************


تعالِى...
على كيفك تعالى
على مهلك تعالي
طيوفك تحدثني تونسني تجيبك ليَّ قُبالي
حروفك توريني و تيقني تسرو بالي
ظروفك تدرسني تعلمني تجاوب ليَّ سؤالي
غيابك ماهو منك دي أحداث الليالي
على كيفك تعالى
بريدك مهما غبتى بريدك ريد مثالي
وريدي ليكِ ماهو صدفة و لا خيالي
و أفتشلك الأعذار تغيبي و لا أبالي
ومهما طال غيابك يوم بترجعي يا غزالي
على مهلك تعالى
زي ما قالو في الأمثال الأيام حَبَالي
بترجعي ليَّ نايرة و زاهية أنوارك تلالي
رجوع يوسف الصديق عزيز ومقامو عالي
وبشارة بصر يعقوب وأيامو الخوالي
على كيفك تعالى
برجاك متسربل الصبر الجميل ساتربو حالي
يبقالي زي نار الخليل يقويلي احتمالي
ينجيني النجا ذا النون في بطن الدوالي
وفدى أسماعيل بي قدرتو من أعلى الأعالي
على مهلك تعالى
برجاك و الأماني سهول زارع فيها آمالي
يطلها غيمك المبهول ويغني ليكِ موالي
برجاك و القلب مشغول يشرح ليكِ أحوالي
يصارحك و بي حنانو يقول على مهلك تعالى
على كيفك تعالى
على كيفك تعالى
على
كيفك
تعالى
......***********************

الرحيق العذب


سقتني مـن أعذب رحيق
لمان سكرت غلبني أفيق
دخلتني عنوة بلا إذن
سكنتني حِن
لبستني في عينيها موج ..قربت أجن
رقتني مــن إكسيـر حبها
دروشْ... مسكْ على إيده الطريق
اتصوفت في عيون المها
غرقْ..مرقت على الوساع من بعد ضيق
خمد الحريق
فـــي جـــوفـي اتمـدت شهـد
انثالت كما الروح في الجسد
طلعت مع الأنفاس نشيد...نزلت موسيقى مع الشهيق
غنيـتْ بي بلــور كلامــه
نثرت عليّ سحر ابتسامه
لفتني إيديها الغمامــة
وسدتني الليل المحاق
ضمتني في حضن المذاق
توجتني أمير على القلب الرقيق
عرجت بي لي جنة هواها و شمسها
زفتني فـارس أحــلامــه و عُرسهـا
بقيت حاضر هواها و أمسها
وبقت سدرة منتهـاي و أنسها
في عالم العشق الأنيق
**********************************


أنا و إنتي الشاطي و الأمواج
تلاقي النسمة و النخل المجبد شال
حاضنو القيف و عينو عليهو
شقيش ما يميل تلقاهو طربان مال
و صوت القمري في النّسام
تلاقي حروفنا و الكلمات مع نغماً يقج هدّال
قبايل عيد ... خمايل ريد
ودفقة ضو ... صفقة و نم
وزاد الخير ..وطن ينجم ...بعد ترحال
وقار النيل ...مهيب بلحيل
اتوسد ضفاير الليل ... جنوب و شمال
صرخ بالشوق و فوق الفوقو جاب موال
مسادير صادحة إشراقات ..سحاب دوبيت
هطل إنصاف ... حريرة و فال
صُفاح أنهار مع البحر العميق فوار
قمر شاهد ... معاهو الليل ..سهول و جبال
وأرض حلفت ... شافت زفة المطرة وغنا الشلال
فراق الضو من الشمس الرضية محال
و النجم احتفل غطى الدروب بالسيرة
ماسك في إيديهو أطفال
عشانك إنتى فرش الواطة ضو طاهر رزين و حلال
ولبس الأغاني سيوف
دُخري الحوبة هزّ ورزّ شال شبّال
وزفوك يا مهيرة الروح .. للقلب الخفيف تقال
وانفتحت نفوسنا ديار ضماك بالعديل و الزين
وشلناك فوق رموش العين سرور و جمال
*******************************


أنا بسمعك
لمان يدق صوت الدليب
جواي تدق تمرة قليب
شايلك دوام ما ضيعك ...... وأنا بسمعك
ما أروعك
يا عضم ضهر الغنا و بحر الغناوي الخالدة يا أبونا النعام
تنسلا زي خيت الشمس تغسل وجوه مدن الظلام
تنسده طاقة الهم ..تعوم الدنيا في بحر السلام
تشرب ينابيع الهنا من منبعك ....... وأنا بسمعك
غيمك رزم بلع الهجير
شتت عطور الخير و صفق للسرور
و انشرّه نور
شايل بشارات مطلعك ...... وأنا بسمعك
ضنَ القدر يوم صنّ ختفك يا ملِك
مجروح يئن باكي الشِعر
واتيتمت دارة مهيرة أم السِحِر
مات الشتم بعدك هِلك
يبست حلوق الأغنيات و انكسر مِرق السِلك
كيفن يرن و قليبو فارق أصبعك ....... وأنا بسمعك
ما أبدعك
بيناتنا حي ما متّه والزول الوسيم راجيك يحن
حلمك عليّ ياهو المقدر ديمة في إضنيَ تدن
ساقة غناك قادوسه ساكب لينا من
عسل الغناوي المنو نروى و نستريح في مرتعك .... أنا بسمعك
ما أرفعك
سامي و تضارع في شموخك مروي و آثاره وقمرنا
طامي يا نيل الخلود منك شرب ريان تمرنا
هامي يا مطر الخريف الصبّ يروي محل شدرنا
يا حامي درقة شايق الموسوم حضارات في صدرنا
رامي يا الضل الرهين فارقتنا و جمر الفراق نجضّ صبُرنا
رضرض عضام الفرحة فينا و مزق أرواحنا و عمرنا
وقطّع أوصال النغم يوم ودعك ....... وأنا بسمعك
أنا بسمعك
يا الكنت زغرودة الجميع في الفرحة و الفال السمح
كنت الندى الرَّطب حليقات الخدار نديان ِصبح
ياكا النخيل جمبو الحراز وإنت السنط قالد الطلح
كنت المِسور نيلنا الجسور ياكا المريق وأخو القمح
إنت الشمال بي عزتو و ناسو الحُنان الصِح وصِح
إلا ما شاورتنا و فارقتنا و في ذاتنا عمقت الجرح
وانهدّ ركناً كان منيع في موقعك ...... وأنا بسمعك
ما ألمعك
رغم الرحيل بُعد المسافة واستلابات الزمان
جوانا كامن في أمان
جوه النفوس منحوت معتق ذكرتك في كل لسان
كلما طلت شمس أو لامس أوتارنا البنان
ضو النجوم ياهو النعام طنبورو عطّر كل مكان
سائل المولى القدير دعواتنا ليك تغشاك في عالي الجنان
تلقاك مع الحور في النعيم متهني في الخير و الأمان
والرحمة ليك تبقي المهاد
و المغفرة التوب و الوساد
مليون سلام و أضعافو دعوات و ابتهال
راشعات دوام في موضعك .... وأنا بسمعك
أنا بسمعك
أنا بسمعك
*******************************


دليبو دنّا .............الشمال
طنبورو رنّا ... ........الشمال
نغمو الحنون نقّر شغلنا ... سِحِر الشمال
لى طِيبة أهلنا
وريفو الحبيب... الشوق كتلنا ... عزّ الوصال
نيلنا و تمرنا
عند المغيب... قوقايو غنا .... رقص الجمال
حيضان شتلنا
شربت ِروَت... نبع المحنة ... صافي و زلال
ضاحك قمرنا
فوق الروابي ... لجلج فتنّا .... فوق الرمال
فوق المظنة
حورنا و بناتنا... فيهن أملنا ....كل الكمال
باسم زهرنا
فايح عطور... نَسّام غمرنا .... لألمنا أزال
خُدرة شدرنا
غنت طيورو... لحناً سحرنا.... بهر الخيال
جَـِرفْنا َتنّى
لوباهو جرجر... ما جافى ضنَّ... وخابت أمال
مَرقن مِسَرْنّا
قندوله دندح ... زي ما تمنى .... تربالو نال
فنانو غنى
دارتنا عامري.... طايب سمرنا .... و فرحنا طال
ِوزْينو حَنّ
في الدارة دَفّر ... ناح سلكو أنّ .... وعويدو مال
دا شمالنا جنه
دانيات قطوفه .... خيرن شملنا...... يانع حلال
في الدهر فنَّه
لو الله اراد .... وأداك جنه ..... زُوُر الشمال
*****************************

يامنايا


من ملامحك صُغتو مسداري و غنايا
لي مسارح الدهشة فيك سايق خطايا
للأماني و للتهاني و لي هنايا
للغيوم الساكبة حنك في سمايا
لي تراتيل النداوة في البداية و للنهاية
ولا نهاية شايلو ريدك في الحنايا
شبّع أوصال التعابير من هوايا
وشدّ أوتار النشيد لي أسمى غاية
ليها غنى و قال و أسمع
بي هديلن من حفيف النسمة أروع
قادر الله السوى أبدع
لي عيونك فيها شفت النيل بيلمع
لون خدارو
وطيب مسارو
وفوق ضفافو النايرة شُفع
يجرو عاقبين السواقي وفوق رمالو
جينا ليكي
وليك جابنا الشوق و ترّع
هزّ أوتار القصايد لي قلوبنا العاشقة لوّع
يا عيونك
لون بلادي
وادي وادي
وتمرة تمرة سعيفه نادي
والقماري الحانية تسجع
في العصاري
وطير خُداري
والدباس في عشو فقّع
النخيل ضماهو حاني و لوحة أروع
هش فاتح حضنو لينا
لما جينا
وزادنا مقطع
قالو كُنه.. وفوقو سوا الدابي بدّع
يا طراوة يا طلاوة
يا شهد قطّر حلاوة
من شفايفك مازج البسمة النداوة
في سماوات حسنك الطاغي الخرافي
بيهو ازدادت غلاوة
ودغدغت سر القوافي
الكامنة فينا ... عليك مشينا
وليكي جينا يا ينابيع التصافي
جينا نسرح في ضياكي
نروى ننهل من منابعك
جينا نبحر في قفاكي
نبرا شلالن متابعك
فيهو أول مرة شفنا
البحار أمواجه ظلمة و لونه حالك
نابعة من قمرات وشيكي
وصابه بين جنات جمالك
وإنتي ومضة
عليها سرنا بعد ضهبنا قبل مجيكي
وخطوة خطوة مع مشيكي
قلوبنا دقت نبضة نبضة
ولحظة لحظة عمرنا فيكي
وحاتك إنتي ضمة ماب نبخلبو ليكي
يا رزازن
داعب أغصان الحراز
غازل التمر المخدر فوق جديولن طرفو ناز
و الطير خنس في عشو كايس للملاذ
والذكرى في قلب الحبيب جابتلو أيامو العُزاز
و الشوق غلب صدالو زمنو اللا ورا
طراهو جيتو مع المغيب أيامو ديك إذكره
جراها جابه مع النغم من فيض محاسنك عطره
وغنى ليك
أنا يا منايا
أنا يا منايا
*****************************

الوديعى


ما بكيتك بي عيوني وما ذرفت عليك دموعي
إلا ببكيك في الحنايا من دواخلي ومن ضلوعي
عيني للآمال بتذبل و إنتي قدامي بتضيعي
إلا ما باليد حيلة و الفراق بقا شي طبيعي
الزمن بيناتنا صيّف يبس الحلم الربيعي
والقدر جفف رحيقنا وزادنا في الآلام وجيعي
في بحر ظلمات طواني شايل الأحزان شموعي
فوق ايدي قلبي المجرح تحكي نبضاتو الفجيعي
تروي للعشاق حكايتي قصة آمالي الصريعي
وإني كيف في الحب شربته علقم المُر و النقيعي
كنت راجيك من شويفعي دابه فوق الليد رضيعي
و فيكي شايف عمري كلو و كل آمالي الرفيعي
فيكي شايف حلمي يكبر و إنتي تكبري في ربوعي
بس كبرتي و فوق شفاهي ماتت البسمة الوديعي
يوم رحلتي بلا وداع و الرياح قصفت قلوعي
وأظلمت دنيا السعادة و انطوت صفحات سطوعي
كنت قايل إني بقدر كت مأمل في رجوعي
أحيا بين الناس وانسي غربتي وأسباب نجوعي
بس وحاتك ما قدرتَ نفسي تب مو مستطيعي
وقدر ما حاولت أصبر الصبر ما كان شفيعي
كنت أهيم بينات رياضك في نزولي و في طلوعي
و إنتي قدامي بتقيفي في صحايّ و في هجوعي
للإله إيديا برفع في تراتيلي و خشوعي
وأدعو من جوايا ليكي في سجودي و في ركوعي
ليا ترجعي يا منايا و تاني أرجع زول طبيعي
و إن مشيتي ودعتك الله عندو مابتضيع وديعي

*****************************

نبع الذات


لو كتبت أنا كل حروف الدنيا في كلمات
ولو رسمت أنا كل معاني الروعة في أبيات
تجسد للأنام روعة خيال فنان رهيف الذات
وتحكي الدنيا في شخصك جمال إبداع و إشراقات
ألقى إحساسي تاه مشدوه أمامك يا سما الغايات
لأنك روعة أروع من جمال كل الكتبتو صفات
نبع الحب وحاتك إنت شال منك حلاوة الذات
وحسنك أسمى من قمة بنات أفكاري والكلمات
سحرك طاغي هالات نور تمزق عتمة الظلمات
هزاها النفوس خلاها تتمايل مع النسمات
نغمك فرحة تنساب بالحنان الدافي كالصلوات
بلسم للقلوب الحايرة يطفي أنينه و الآهات
ندى خديك حنان يمسح مآسي أيامي و العبرات
و في عينيك نسيت أحزاني ظلم الدنيا و الحسرات
نوّري في ربيع دنيانا نسيني الزمان الفات
لوّني بالفرح أيامي ضويلي الأمل شمعات
الزين و العديل يجمعنا تمشي البهجة في الساحات
مناي إن تم من جوايا ينساب الفرح آيات

*****************************
الوحيدة


أونــس نجــمات بعــيدة أوصــف ليهــا الــبريده
رفيقــة روحـي و نشــيده مواســم فرحـى السعــيدة
ســعادة الــدنيا الفــريدة بريــده بريــده الوحــيدة
محكــره جــواي قصــيدة بريــده و أريـدو ترديــده
حــنان النســمة الوديعــة تشــبه حســن الطــبيعة
زهــور الروض في ربيعــه رقيقــه طباعــه و رفيعـة
نوره الـنور فيهــو ذايــب جماله عــناق الحــبايب
طــيبة خاطــر الأقـارب وحـس البلــد المغــارب
لهــيجه حنيــن القـوافي تراتيــل شــوق المرافــئ
رنــة وأوتــاره دافــى ضــمة أحضــان و عـافـي
لونــه ســمار الأصــيل طــعمو ثمــار النخــيل
هجعــة ضــلو الظــليل لمســة تــداوى العــليل
ألفـة نيلــنا و جــروفـنا روعــة ابـداع حــروفنا
غــنانا وإيقــاع دفــوفــنا تبســم لمعــة ســيوفنا
شــوق الطــول غــيابـو جـاهـو و قـبل ترابـو
وطــنن يا ما انتشــابو فيهــو يسـامر صــحابو
معــاناة أحرف مشــاعر متكـتنة في قلــيب شــاعر
تنمــو قصــائد زواهــــر تعـطـر كـل الـبيـادر

***********************

رسالة للشاعر القامة: سيدأحمد عبد الحميد

أنزف واكتب أشعارك لا تبخلبها أناتك
قراطيسك شغاف قلبك مدادك من دموع ذاتك
اكتب بي لسان حالك عبّر عن معاناتك
سلواك في البيان تلقاها نفّس فيها عبراتك
يا شاعر القوافي الباكية لا تحرمنا نفحاتك
تخلي قلوبنا تتلفت فراشه يكوس لزهراتك
و نحنا إحساسنا ماب يقدر يعيش من غير مناجاتك
وأرض الدنيا لو ضاقت مراسي شوقنا أبياتك
دحين يا (سيد) غناوينا و(أحمد) في مسراتك
أسكب من عيون شعرك وأهطل من سماواتك
أروي نفوسنا ابداعك و أشتل فينا غنواتك
و عالمنا الكئيب عمرو نوّرو من سنا ذاتك
تزرع بور صحارينا جنان ترويها قطراتك
بي حزمة حروف منك تضوي الدنيا شمعاتك
قلوب العاشقين التايهة طب احزانه لمساتك
وأنا عارفك رهيف احساس عذابو ورا ابتساماتك
يا سر القوافي النازفة شايلة الشوق في ريشاتك
أرسم فوق مشاعرنا وفاك و أسمى غاياتك
دوَِِّن للزمن ريدك لا تندم على الفاتك
مصيرو يعض بنان ندمو و يعود يرجع لساحاتك
براعم زهرو يوم تذبل مصيره تحن لنسماتك
و روضو الصادي من رَوَّح يشابي يكوسه غيماتك
حروف كلماتو يوم تعقر وراك تشتاق لكلماتك
و أنغامو البعيش فيها نعيق من غير نغيماتك
لأنك إنت خلدتو و رفع لي حبو راياتك
مصير عصفورك الهايم يعود و تكِيده شُماتك